Fenomena festibalean "oso giro atsegina" sortu da
1.000 pertsona inguru hurbildu ziren rocka ardatz duen festibalaz gozatzera. Fenomena Kultur elkarteko kideak festibalaren balorazio positiboa egin dute.
Sr. Chinarroren emanaldia. Argazkia: Fenomena K.E. Larunbatean gauzatu zen rock musika estilo ezberdinak jasotzen dituen Fenomena Festibala. Festibalaren antolatzaileak kontent agertu dira festibalak izan duen harrerarekin. Elkartearen erronka handiena “jendea etortzea eta taldeekin interakzio bat egotea” zen, eta kontzertuak hasi ziren momentutik bete zuten hori. Entzule ugari hurbildu baitziren hondartzako aparkalekuan ezarri zuten karpara, “momentu batzuetan 1.000 pertsona inguru egon ziren eta uste dugu gure maila dela hori. […] Oso fidelak izan ziren, eta kontuan izanik talde bakoitzak musika estilo ezberdina zuela, hori guretzako oso pozgarria da” azaldu du Iñaki Vazquezek.
Segurtasunaren aldetik ere pozik agertu dira elkarteko kideak, “horrelako festibal handi baten aurrean, lehenengo gauza, arazoak egon ez daitezela ziurtatzea da, mugimendu handia sortzen baita”. Zentzu horretan ezbeharrik gertatu ez izana positiboki baloratu dute. Bestalde, jendearen laguntza nabarmendu eta eskertu nahi izan dute,”laguntza asko izan dugu backstage-n eta baita barran ere”.
Kontzertuez gain, 12:00etan Joseba Irazokiren pintxadak ireki zuen festibala. “Oso giro atsegina sortu zen eta polita izan zen”. Bertaratu zirenek bai eta tabernetako jabeek ere une ederraz gozatu ahal izan zuten, ondoren kontzertuekin borobildu ahal izan zutena.
Mishiko Fes
Fenomena festibalean bertan, Psilocybeko kideek abenduan egingo duten festibala -Mishiko Fes- aurkeztu zuten. Bi eguneko festibala izango da (abenduaren 2 eta 3an). Lehen egunean Feline band eta Victimas club taldeen kontzertuak izango dira, bigarrenean, berriz, Cuello eta Biznaga taldeak eskainiko dute emanaldia. Egun berean, Viv Vintage egongo da DJ lanetan.
