Aurrerapausorik ez garbitzaileen eta enpresaren arteko negoziaketan
Urriaren 4ko bileran egindako proposamena atzera bota eta irailean baino proposamen xumeagoa egin du ISS Facility Servicesek.
Duela astebete (urriaren 4an) bildu ziren, berriz, udal garbitzaileak ISS Facility Services enpresarekin, eta negoziaketak bere fruituak eman zitzakeela bazirudien arren, ezerezean gelditu zen azkenean, garbitzaileen “itxaropen urriak zapuztuz”. ISSk proposamen bat egin zuen orduan; bost urterako proposamena, urtero %5eko soldata igoera proposatuz. Azken unean, ordea, “mahaian esandakoa matizatu” egin duela azaldu du ELA Sindikatuak, gaurko bileran %0,75eko igoera eskainiz. Horrela, irailaren hasierako eskaintzara mugitu dira kasik.
Udalak, bestalde, zerbitzu minimo handiagoak eskatu dizkie grebalariei. ELAk eskaera hori salatu egin du. Udalak, “Satarkan eta Loraitzen zerbitzu minimoak betetzen ez direla dio” azaldu du Xabier Etxanizek Antxeta irratian egindako elkarrizketan. Baina garbitzaileak zerbitzu minimoak betetzen dituztela ziurtatu du ordezkariak. Enpresak bere aldetik, langile ezberdinen arteko txandakatzean egin litezkeen zerbitzu minimoak, pertsona berdinei “inposatu” dizkietelaz kexatu da Etxaniz.