Bidasoko harrobia Euskadiko selekzioarekin aritu da
Elaia Tapia, Alaine Agerralde, Naia Llorente eta Leire Martiarenak jaso zuten ordezkatzeko deia. Taldea bigarren izan zen.
Iruñean izan da asteburu honetan Pistako 16 urtez azpiko Federazioen Espainiako Txapelketa, eta bertan izan ziren BATeko Elaia Tapia, Alaine Agerralde, Naia Llorente eta Leire Martiarena. Euskadiko selekzioa ordezkatu zuten eta zazpigarren postua bereganatu zuten.
Euskadiko selekzioak 210 puntu lortu zituen Espainiako txapelketan eta BAT-ek azpimarra jarri du beraien harrobiko atletetan.
Harrobiko kideen artean, puntu gehien poltsikoratzea lortu zuen Elaia Tapiak, luzerako jauzian. Txapelketa ona egin zuela du iritzi talde bidasoarrak eta bere salto hoberena 5, 20 metrokoa izan zela adierazi dute. “Bigarren postua irabazi zuen, zilarrezko domina eta hamazazpi puntu taldearentzat”. Tapiaren ibilbideaz oroitu dute uztailean laugarren izan zela Espainiako 16 azpiko Txapelketan.
Espainiako 300 metro hesietako Txapelketako txapelaren zaporea kendu gabe, Alaine Agerralde ere hautatua izan zen. 300 metro egin zituen korri beste behin eta hirugarren sailkatu zen 42,31 segundoko marka eginez. Horrez gain, 4×300 metroko errelebo jokoan ere aritu zen eta laugarren geratu ziren, “domina irabazteko hiru hamarren falta izan zitzaien”, azaldu du BATek.
Taldearentzat oso garrantzitsuak izan ziren 15 puntu irabaztea lortu zuela Naia Llorentek esan du Bidasoko atletismo taldeak. “Hamasei izan zitezkeen, eta brontzezko domina, baliogabetu zituztenengatik izan ez balitz”. Dena den, 1,59 metroko marka “interesgarria” egin zuen Llorentek taldearen esanetan.
Leire Martiarena ordezkari izan zen 100 metro lauetan eta 13,24 segundoko denbora egin zuen, bosgarren postua irabazi zuen finalaurrekotan. Bestalde, errelebo motzetan, hau da, 4×100 metrotan ere parte hartu zuen eta ozta-ozta ez zuen domina lortu. “50,37 segundo haientzat, podiumetik bi ehunenera baino ez”.