Astelehenean zabalduko dute Erletxea
Astelehenero 12:00etatik 13:00etara izango da zabalik besteak beste gizarte laguntza eta eskubideen gaineko informazioa ematen duen bulegoa.
Astelehenean zabalduko dute Erletxea, 12:00etatik 13:00etara. Astelehenero zabalduko ditu ateak besteak beste gizarte laguntzen nahiz eskubideen gaineko informazioa ematen duen eta herritarrek kudeatzen duten bulegoa. Kale Nagusiko bosgarren atarian dago egoitza.
Informaziorako eta salaketarako baliabidea da Erletxea. Han, gizarte eskubide eta laguntzen gaineko informazioa ematen diete nahi dutenei, prekarietatean bizi direnen salaketak bideratzen dituzte, eta pertsonek duin bizitzeko duten eskubidearen gaineko argibideak ematen dituzte. “Ezjakintasun garaiak bizi ditugu. Elite ekonomiko eta politikoaren erabakiak pertsona zaurgarrienek jasaten dituzte. Ezin gara eskubiderik gabe gelditu informaziorik ez dugulako. Inoiz baino garrantzitsuagoa da informazioa esku artean izatea, eta gure eskubideak eskatzea”, esan dute Erletxetik.
Langabezia ordainsaria, pentsioak, gizarte laguntzak, Diru Sarrerak Bermatzeko Errenta (DBE), edo larrialdi sozialerako laguntzak kudeatzen laguntzen dute, beste askoren artean, Erletxean.
