Bide publikoko eta argiztapeneko lanak amaitzeke
Irungo Udalak irisgarritasuna hobetzeko eta kutsadura murrizteko kanpaina bat abiarazi zuen. Guztira miloi eta erdiko aurrekontua ezarri du udalak.
Irungo Udalak bide publikoa irisgarriagoa bihurtzeko eta argiztapena sostengarriagoa egiteko kanpaina bat abiarazi zuen. Lan hauek azken txanpan daude. Guztira miloi eta erdiko aurrekontua ezarri du udalak lan hauek burutzeko.
Bide publikoaren konponketa lanak, zehazki, oinezkoentzako ardatzak hobetzeko, espaloiak zabaltzeko, edo pasabideak lotzeko lanak dira. Udalak sei puntu identifikatu zituen. Dagoeneko zenbait kaleetan lanak amaiturik daude; Berrueta Pintorea kalea, Juan de Albisu kalea eta Teodoro Murua kalean esaterako. Egun Toki Alai ikastetxearen eta Altzukaitz kalearen inguruan ari dira, eta laster, Uranzuko 51 eta 55. zenbakien artean eta Letxunborro kalean abiaraziko dituzte.
Lan hautarako 342.919,49 euro erabiliko dira guztira. 308.677,69 euro Europako Funtsetatik eskuratu dira. Enpresa esleipeduna Construcciones Otegui-Gaztañaga izan da.
Argiztapenari dagokionez, kutsadura murrizteko hiriko sei puntutako argiztapenak aldatzeko lanak abian dira. Zehazki, Salvador Etxeandia karrikan, Eguzkitzaldea eta Luis Mariano kaleetan, Letxunborro hiribidean, Sarjia parkea eta Kolon ibilbidean egingo dituzte lanak. Guztira bost hilabeteko epean burutuko dira eta aurrekontua 231.484,45 eurokoa izango da.