Bidasoa Irun taldeak atzo hasi zuen 2022-2023 denboraldia. Lehen entrenamenduaren ondoren "sentsazio oso onak eta positiboak" izan dituzte.
2022-2023 denboraldiko lehen entrenamendua burutu zuten atzo. Entrenamenduetako poltsa bete, zapatilak jantzi eta Artaleku kiroldegian bildu ziren atzo arratsaldean Bidasoa Irun eskubaloi taldeko jokalariak. 2022-2023 denboraldiko lehen entrenamendua gauzatu zuten hori-urdinek. Gurutz Aginagalde presidenteak, zuzendaritza batzordearen izanean ongietorrian eman eta segidan, Jacobo Cuetara entrenatzailearen aginduetara jarri ziren. Aurre-denboraldi guztietara “topera” etortzen da Cuetara, baina aurten “sentsazio bereziekin” itzuli da gainera, “egin dugun taldea asko gustatzen zaidalako”. Gainera, lantaldea urte askoz elkarrekin aritzea “berme” bat dela azaldu du.
Lehen taldea (hainbat arrazoirengatik) murrizten ari da, baina bertako gazteekin osatuko dute. Honako jokalariak izan ziren bertan (lehen taldekoez gain) : Asier Nieto, Mihajlo Mitic eta Jakub Skrzyniarz fitxaketak barne, Xabier Barreto, Asier Iribar, Diego Viles, Joshua Omojola eta Endika Wamba. Datorren astean Eneko Furundarena, Gorka Nieto, Julen Urruzola eta Julen Mujika batuko dira, bai eta Harbaoui Mehdi atezaina ere.
Guztien artean bildutako sentsazioak “oso onak eta positiboak” izan zirela adierazi du Jon Azkue kapitainak. “Jendea oso gogotsu dago. Taldea oso ongi errefortzatu da. Oinarria ongi jarrita dago eta denboraldi ilusionagarria dugu aurretik”.
Taldeak datorren astean izango du denboraldiko lehen partidua. Honakoa lagunartekoa izango da eta Billère Pau Pyreneesen aurka (aurkariaren etxean) jokatuko dute.
Bidasoari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako.Herrigintza egin nahi dudalako.Hiriko euskarazko komunitatearen parte izan nahi dudalako. Bidasoak eta bidasoarrok behar dugulako.
