Trantsizio denboraldia izan da Zaisa Txingudi Errugbi taldearena
Jokalari erreferenteak joan eta harrobiko zenbait sartu dira taldean. Gainera, hurrengo urtean liga berri bat sortuko da.
Durangoren aurka jokatu zuteneko argazkia. Bukatu dute denboraldia Zaisa Txingudi Errugbi taldekoek eta horren gaineko balorazioa egin dute. Oro har, adorea mantentzea eta erronka askori aurre egiteko gai den taldea eratzea lortu dutela nabarmendu dute.
Harrobiko jokalari berri askoren iritsiera ilusioz bizi dutela adierazi dute. Halaber, bajak eta taldeko erreferenteenak zirenen erretiroa aipatu dituzte ere. “Talde gaztetu horri lanean hastea, multzoa eratzea eta egunez egun hobetzea geratzen zitzaion, sasoiari behar bezala aurre egiteko”.
Indargune esanguratsuena “taldekideen arteko laguntasuna” dela diote, “gutxitik askora egitea lortu zuten mugakoek, taldearen gabeziei helduz, hala nola defentsan agresibitate eskasa edo gehiegizko diziplina hutsak”. Aurkari indartsuagoei aurre egiteko ezinbestekoa dela iritzi dute.
Jarrera hori denboraldi honetan garatu duten arren, Anoetan Bera Bera B-ren aurka lortutako garaipenera berandu iritsi zela diote, “bonus puntuak ez ziren nahikoa izan hamargarren postua, jaitsiera zuzeneko postua, atzean uzteko”.
Bigarren euskal liga federazioaren piramidearen azken liga dela jakinarazi dute eta hurrengo urtean haien aurkariak nortzuk diren jakiteko goizegi dela diote. “Dagozkien igoerez eta jaitsierez gain, oraindik ikusteko dago zein talde inskribatu edo desagertuko diren”. Dena den, susmoa dute Amorebieta, Iruñea, Arratiko Zekorrak, Lasarteko Beltzak eta La Unica, Gaztedi eta Riojaren filialek jarraituko dutela.
Hurrengo denboraldian 18 urtez azpiko taldekoak izan diren Oier Mendi, Asier Aranburu, Andoni Quiñones eta Erlaitz Ayuela batuko dira talde nagusira, eta Ioritz Franco eta Erik Gonzalez jokalari ohiek berriz zelaia zapalduko dute. Taldea utziko duten jokalariak honako hauek dira: Pachi García, Ugo Poncini eta Alejandro Lasa. Bestalde, Lander Vielba Hernaniko 23 urtez apizko taldera joango da, eta Sylvain Lapeyre urruñarra AS Urruñaken arituko da; Unai Herrero, aldiz, Bordelera doa.
