Solas Jolasen nondik norakoak azaltzeko bilera ekainaren 21ean
Plaza zozkatu beharrean, ordutegiak ezartzeko zozketa egin dute. Bestalde, gurasoentzako informazio saio bat egingo dute hilaren 21ean.
Gaur egin du agerraldia Miren Etxebeste Euskara ordezkariak. Solas Jolas programan izen emateko prozesua aldatu egin da eta horren berri eman du Miren Etxebeste Euskara ordezkariak. Aurten, plaza zozkatu beharrean, eskainitako plazetan izena emateko orduak zozkatu dituzte.
677 eskatzailek egin dituzte eskariak behin behineko deialdian, 862 haurrentzako plazak betetzeko. Dagoeneko 52 taldeak osatu dituzte, eta, ondorioz, izena emateko epea ixtea erabaki dute. “Behin betiko izen-emateak ikusita, emaitza positiboa izan da. Izena emateko lehen aldian ia plaza guztiak esleitu ziren eta, kontratuaren eta pleguen aukerak aztertuta, lehen hezkuntzako taldeak 12 plazatik 14ra handitzea erabaki genuen, eta denak bete dira. Hortaz, oso pozik gaude”.
Orain, informazio bilera bat egingo dute ekainaren 21ean 18:00etan Palmera Monteroko 2. aretoan. Bertaratu ezingo dutenentzat informazio guztia udalaren webgunean egongo da ikusgai.
