Nagusikleta, kalearen parte sentitzeko dinamika iritsi da Bidasora
Danimarkan sortu zen Nagusikleta eta jada 56 herrialdetan dago martxan. Adinekoekin bizikletan paseoak ematean datza proiektua, eta Bidasoan finkatu nahian dabiltza.
Urriko irteerako argazki bat. Gehiago Balaztaren blogean daude. HITZA Geroz eta gehiago entzun ohi dira bakardadea eta indibidualismo kontzeptuak, bi baldintza horietan bizi baita egungo gizartea nahita edo nahigabe. Batzuek aukeratu egiten dute bizitzeko modu hori, baina beste asko gogoz kontra daude, batez ere, bakarrik. Adinekoak dira nagusiki bakarrik sentitzen direnak, eta Hondarribiko Udalak horren gaineko ikerketa egin du, herriko nagusiek zein egoera sozio-pertsonala duten jakiteko. Ildo horretatik doa Nagusikleta: adinekoei bizikleta irteerak egiteko egitasmoa da, konpainia onean.
Nagusilan irabazi asmorik gabeko elkarteak, bakardade egoeran dauden adineko pertsonei laguntzen die boluntarioen lanarekin. Bertako kide da Jesus Mari Gerra hondarribiarra. Donostiako Bizikletaz Adinik Ez proiektuaren berri izan zuen. Hiru plazako (gidaria barne) bizikletak erabiltzen dira egitasmoaren barruan adinekoei paseoak eskaintzeko. Baina, bizikleta horiek erabiltzeko ikastaro bat egin behar zela azaldu zioten; bertaratu egin zen Gerra eta Balaztako kideekin egin zuen topo bertan.
Txirringak bereziak dira. Izan ere, bizikleta bakoitzak 60 kilo pisatzen ditu hutsik, eta bi pertsona gainean nahiz txirrindularia batuz gero, ia 300 kilo metatzen dira. Ikastaroa egitea ezinbestekoa dela berretsi dute Balaztako kideek, batez ere kontu handia izan behar delako jendea garraiatzen denean.
Lehen pedalkadak
Ikastaroa burutu zuten Balaztako zazpi kidek, tartean zirela Manu Eizagirre eta Iñaki Daboz. Hondarribiko Mugikortasunaren Asterako Donostiako lagunei triziklo berezi horiek eskatu, eta paseo batzuk ematea proposatu zuten. Eguraldia ez zuten lagun izan, eta atzeratu egin behar izan zuten Nagusien Egunera arte, urriaren lehen egunera arte. Maiatzean berriz, Nagusikleta izenarekin lehen paseoa egin zuten: hiru triziklotan 32 pertsonarekin ordu eta erdiko buelta egin zuten.
Irun eta Hondarribiko bost erresidentzietako erabiltzaileak ziren paseoak eman zituztenak, zehazki, Hondarribiko San Gabriel eta Betherramekoak, eta Irungo Caser Anaka, Ama Xantalen eta Inmaculadakoak. Paseoak bukatzean adinekoak oso kontent azaldu zirela adierazi du Eizagirrek, eta Gerrak nabarmendu du erresidentziatik ateratzeko proposamena beharrezko dutela: «Irunen aurrekoan Behobiaraino joan ginen, eta Erdi Aroko azoka zegoen; erresidentzietako jendearentzat egoitzatik kanpoko edozer nobedade handia da». Eizagirrek gaineratu du kalera irteten direnean «bizitzaren parte» sentitzen direla.
Nagusikleta Bidasoan
Osotara bi irteera egin dituzte dagoeneko, bata urrian eta bestea maiatzean. Baina bietarako tandemak eskatu egin behar izan zituzten, eta orain haienak lortu nahi dituzte. Eskaera egin diete Irun eta Hondarribiko udalei, eta adierazi diete nahiz eta oraingoan erresidentziekin lanean aritu diren, behar hori eguneko zentroetan ere badagoela eta, beraz, inbertsioa egitea defendatu dute. Gerra: «Dirua lortuz gero Balaztak eman dezake laguntza teknikoa, segurtasun handia behar delako adinekoekin. Alde horretatik babes ona da Balazta».
Boluntario sarea eratzea ere beharrezkoa dela uste dute, eta Irunen nahiz Hondarribian proiektua finkatzeko ikastaroa egitera animatu nahi dituzte txirrindulariak.
