Aurreikusitako epean ekin diote Gibeletako lanei
"Kalez kale Hondarribia programa erritmo onean doa" eta horrenbestez, gaur bertan asfaltatze, fresatze eta margotze lanekin hasi dira.
Txomin Sagarzazu alkatea eta Gonzalo Carrion Obra eta Zerbitzuetako zinegotzia Gibeleta auzoan, gaur goizeko prentsaurrekoan. Martxoaren 7an jarri zen martxan Kalez kale Hondarribia programa. Ordutik, Donostia kaleko eta Kosta kaleko lanekin aritu dira. Txomin Sagarzazu alkateak azaldu duenez, “Kalez kale Hondarribia programa erritmo onean” doa eta beraz, aurreikusitako epean ekin diote Gibeletako lanei.
Gaur bertan asfaltatze, fresatze eta margotze lanekin hasiko dira. Joan den astean auzoko arketak eguneratu zituzten. Lan hauetarako, 230.000 euroko aurrekontua izango dute eta bi edo hiru astetan amaitzea aurreikusi dute. Beti ere eguraldiren arabera, “eguraldi txarrarekin ezin baita asfaltoa bota edo margotze lanik egin”.
Kosta kaleko lanekin abuztu bukaerarako edo iraila hasierako amaitzea aurreikusi dute. Donostia kaleko lanekin, berriz, uztaila hasierarako. Hala ere, Gonzalo Carrionek, Obra eta Zerbitzuetako zinegotziak lanekin “pixka bat” atzeratzea balitekeela adierazi du, izan ere, Txingudiko Zerbitzuak “hoditeriek aldaketa bat behar zutela ikusi eta berriak jartzeko baliatu baitzituzten lanak”.
Kalez kale Hondarribia programak 14 hilabeteko iraupena izango du eta dagoeneko programak barne hartzen dituen bost eremuetatik hiru hobetzeko lanei ekin diete.
