[Erreportajea] Espazio baten zain, kalean izan da Ziztaka ikasturte honetan
Kurtsoaren gaineko balorazio baikorra egin du iniziatibak, Kulturakada kultur zikloaren barruan antolatutako jarduerak direla eta. Ginga jartzeko azken ekitaldia hilaren 11n izango da: Ziztaka 2.0 jaialdia.
Ziztakaren Kulturakadaren barruan, antzerkia. Bukatzear da 2021-22 ikasturtea Ziztakarentzat. Halakoetan atzera begiratu, eta balantzea egiteko garaia izaten da, eta Ziztakan ere hala egin dute. Aurten, lehenengoz, Kulturakada kultur zikloa martxan jarri du Irunen euskara eta kultura sustatzeko sortutako iniziatibak. Jardueraren asmoa izan da hirian euskaratik lan egiten duten artista eta sortzaileak ikusaraztea, eta batik bat horiek euren lana plazaratzeko espazio falta agerian uztea. «Aurten kalean egin dugu, espaziorik ez daukagulako», adierazi du Maider Ugarte Garbizu Ziztakako kideak. Espazio hori kafe antzoki bat izateko lanean ari da mugimendua, baina bien bitartean dituzten baliabideekin artistei tokia egiten ari zaie.
Kulturakadaren barruan, lau ekintza nagusi egin ditu Ziztakak, hilabeteko bat. Lehena otsailean egin zuten: arte plastikoaren museo ibiltaria. Bost espazio erabili zituzten horretarako: Berruta denda, Oiasso, Labe Gorri okindegia, Mari taberna eta Hache estudioa. “Espazio bakoitzean artista baten erakusketa zegoen, eta bertan artistak azaltzen zuen zer egin zuen, zergatik eta nola gauzatu zuen, besteak beste”, adierazi du Ugartek. Hurrena martxoan izan zen, eta literaturari egin zioten tartea. Lupe Lekuona ipuin kontalariak haurrentzako ipuinak kontatu zituen, eta Joseba Larrartxe Josevinsky-k komikigintzari buruzko tailer bat eman zuen. Azkenik, Itxaro Bordak Emakumeak, literatura eta euskara hitzaldia eskaini zuen. “Hortik abiatuta, I. Ziztaka Ipuin Lehiaketa antolatu genuen”. Euskaraz idatzitako ipuinak jaso dituzte, eta orain, epaimahai batek erabakiko du norena den lanik onena. Epaimahaia Egoitz Zelaiak, Ainara Maiak, Joxan Elosegik eta Yurre Ugartek osatuko dute.
Apirilean, berriz, bertsolaritzaren txanda izan zen. Korrika Irundik pasatzen zela baliatuz, AEKrekin batera, egun osoko jaialdia antolatu zuten, eta horren barruan, bertso musikatuak egin zituzten. Kulturakadarekin bukatzeko, maiatzean, antzerkiari egin zioten tokia: Nomofobika antzerki taldeak Hackerrak antzezlana aurkeztu zuen.
Ugarteren arabera, helburua askotariko diziplinak plazaratzea izan da: “Alegia, kultura ez dela bakarrik musika eta bertsoa. Erakutsi nahi genuen beste diziplinak ere badirela, eta kulturaren parte direla”. Horrez gain, ekitaldien balorazio positiboa egin dute, bai artisten aldetik baita harreraren aldetik ere: “Hor uste dugu komunikazioan huts egin dugula, baina, hala ere, jende asko hurbildu da”. Ikus-entzuleek lanak “oso txukunak eta kalitate onekoak” izan direla adierazi diete.
Ikasturtea bukatzeko, hurrengo larunbatean, hilak 11, Ziztaka 2.0 jaialdia egingo dute, 19:00etatik aurrera, Moskun. Han emango dituzte ipuin lehiaketako sariak eta, ondoren, Eneritz Furyaken kontzertua izango da.
Lantalde egonkorra
Udari begira datorren ikasturteko plangintza prestatuko dute, eta irailetik aurrera, berriro kalean egon nahi dutela berretsi du Ugartek. Ziztakan bi talde egonkorretan banatuta daude. Bata udalarekin hartuemanean dago kafe antzokiari begira, eta bestea, berriz, kaleko jarduerak prestatzen. Artistek Ziztaka iniziatiba derrigorrezkoa zela iritzi diotela esan du Ugartek: “Denek esan digute Irunen espazio bat behar dela, eta oso zaila dela artista bezala bizitzea eta euren lanak erakustea”
