Euskararen erabilera sustatzeko diru laguntzak eska daitezke
Gaurtik irailaren 15a bitarte egin daitezke eskaerak BAZen edota udalaren orrialdean. Guztira 37.600 euro banatuko dituzte.
Herritar, elkarte, entitate eta ikastetxeek eska ditzakete. Euskarari lotutako diru laguntzak eskatzeko epea zabaldu du irailaren 15era arte Euskara departamentuak. Laguntza horien berri eman du Maria Serrano Euskara zinegotziak, Gipuzkoako Aldizkari Ofizialean iragarkia atzo argitaratu baitzuten.
Udalak 37.600 euro banatuko ditu laguntzetan, “euskararen erabilera sustatzen duten ekintzei laguntza ekonomikoa emateko”. Era honetan banatuko dituzte:
- 9.800€. 16 urtetik beherakoentzat udako ikastaroak antolatzen dituzten ikastetxeei.
- 7.000€. Euskara sustatzeko ekintzak antolatu dituzten talde edo elkarteei.
- 17.000€. Euskalduntze eta alfabetatze ikastaroak egin dituzten 16 urtetik gorako herritarrek, baita euskarazko barnetegi edo ikastaroetara joandako herritarrei.
- 1.800€. Kanpoko errotulazioa euskaratutako establezimenduei.
- 2.000€. Webgunea euskaratutakoek eskatu ahal izango dituzte laguntza hau.
Eskaerak egiteko BAZen edota udalaren orrialde honetan egin daitezke, eta herritarrentzat izateaz gain, elkarte entitate edo ikastetxeei zuzenduta dago. Azken horiek Internet bidez egin beharko dute eskakizuna.
