2022ko aurrekontuei 13,6 milioi euro emendatuko dizkie udal gobernuak
Datozen bi urteetako zenbait udal gastu barnebiltzen ditu kopuruak. Udalak batez ere urbanizazio eta mugikortasun lanetara bideratuko du dirua.
Miguel Angel Paez lehen alkateoridea, gaur eguerdiko agerraldian. Miguel Angel Paez lehen alkateorde eta udal ordezkariak gaur eguerdian jakinarazi duenez, Irungo Udaleko Ogasun Arloa aurtengo aurrekontua 13,6 milioi euro inguru emendatzeko prestatzen ari da. Hots, udal gastuari dagokionean, 2022ko aurrekontuari kopuru hori gehitzeko proposamena luzatu dute. Dena den, kopuru horretan datozen bi urteetan aurreikusten diren gastuak barnebiltzen dira: esaterako, Belartzako aparkalekua edo Irungo tren geltokirako sarbide berriak.
Bada, emendatuko den kopuruaren erdia baino gehiago hiri urbanizazio eta mugikortasunera bideratuko dela aurreratu du Paezek. Bere esanetan, dirua Gaztainondon igogailu berri bat jartzeko edota Poxpologile kalea berrurbanizatzeko erabiliko dute, baita espaloiak konpontzeko kanpaina abiarazteko ere.
Besteak beste, kultura arloan, emendatuko den diru kopuruaren zati bat CBA liburutegian egokitze lanak egiteko baliatuko da; eta gazteriari dagokionean, Artiako gaztelekuan nahiz hiri zentroan haur txoko bat sortzeko erabiliko da. Ingurumen, kirol zein garapen jasangarriko arloetara ere dirua bideratuko da.
