[Galeria] Zaleen txaloekin irabazi du lehen etapa Roglicek
Herritik pasa da Itzuliaren lehen etapa eta bukaera aldera gerturatu da jendea batez ere txirrindulariak animatzera. Kalean entzuten zen garaile izateko aukera asko zituena zela Roglic, eta hala izan da 09:48 denbora eginez.
Kale Nagusitik pasa da lasterketa. JiGoizean ibilbidean zehar entrenatzen aritu dira Euskal Herriko Itzulian parte hartu duten txirrindulariak, eta 14:20 aldera lehenengo irteera egin da hondartzako espigoitik.
Erlojuaren aurkakoa izan da lehen etapa eta Primoz Roglic esloveniarrak irabazi du 09:48 denborarekin; maillot horia ere berak eskuratu du. Bost segundo atera dizkio bigarren izan den Remco Evenepoeli, eta Remi Cavagna izan da hirugarren 16 segundotara.
Ion Izagirre izan da txirrindulari euskaldun azkarrena, gaurko irabazle eta Itzulian lider jarri den Roglic baino 20 segundo geroago iritsi da helmugara (10:08). Peio Bilbaok ez du oso lan txukuna egin lehen etapan, eta hurrengo etapetako lanari erreparatu beharko zaio.
Herrian barna bazeuden Itzulia ikusteko gogoz zeudenak, baina astelehena izaki, ez zebilen jende asko-asko hasieran. Eguerdia pasata ikusleak ugaritzen hasi dira bai Alde Zaharrean, Portuan, eta baita Higer bidean ere. Zaletu asko gerturatu dira batez ere Gipuzkoa eta Nafarroatik.
Helmugara iritsi baino lehenagoko metroak haurrek alaitu dituzte. Asko eta asko izan dira irakasleekin batera animatzera gerturatu direnak. Horrez gain, jatetxe eta ostatuetan mugimendua ikusi da, kontuan izanda astelehenetan deskantsu eguna izan ohi dutela herriko ostalari askok.
