Ane Unanue, Irungo EH Bilduren arduradun politiko berria
Koalizioko kideek bere hautagaitza babestu dute asteburuan. 27 urte ditu irundarrak, eta 2019tik zinegotzi da.
Ane Unanue izango da Irungo EH Bilduren arduradun politikoa, bilkideek hala berretsi ondoren. 27 urte ditu Unanuek, Zuzenbidean graduatua da eta Abokatutza Masterduna. Egun, zinegotzi da Irungo udaletxean (2019tik).
“Irun berezia da eta duen balioaz jabetu behar gara. Gure eskualdeak duen aberastasuna leku gutxitan topatu daiteke. Gure herriaz harro gauden neurrian, irundarren beharrekiko gure konpromisoa handia da: herritarren arazoei aurrez aurre begiratzen diegu eta hauei erantzun bat emango dion proiektu sendo bat eraiki dugu. Zintzotasunez eta gertutik lan egingo duen proiektua, herritarrak heldu gisa tratatuko dituena eta haiekin batera garatuko duguna”, esan zu zinegotziak. Taldekideen ekarpena goraipatu du irundarrak, haren ustez, “politika herritik egiten dela erakutsi baitu” koalizioak, “eta bidean jarraitzeko prest gaude, indartsu gaude eta geroz eta gehiago gara”.
Azkenik, gazteen egoeraz aritu da Unanue, “sistema honek ez baitu gazteon arazoekiko begirunerik”. Belaunaldi “indartsua” dela nabarmendu du, “txarrenari onena ateratzen ikasi duena”. Esperientziaz betetako pertsonak direla aldarrikatu du: “Galtzen garenean bide berriak irekitzeko gaitasuna erakutsi dugu. Etorkizuna ilun ikusita ere aurrera goaz. Gure buruari merezitako aitortza eman behar diogu. Irunen emango diren aldaketak gure eskutik etorriko dira, zalantzarik ez dut.”