Urmael bat sortu dute Puianan, "ikastetxeek helburu didaktikoetarako erabil dezaten"
Umael eta hezegune txiki bat sortu dituzte baratze parkearen ondoan, "horrelako habitaten eskasia arintzeko eta ingurune urtarretako biodibertsitatea sustatzeko" asmoz.
Irungo Udalak, biodibertsitatea ikasgelatik kanpo aztertu eta ikasteko asmoz, urmael bat sortu du Puianako baratze parkearen ondoan, “ikastetxeek helburu didaktikoetarako erabil dezaten”.
Azken hilabeteetan urmael eta hezegune txiki bat sortzen aritu direla azaldu dute udaleko iturriek, “horrelako habitaten eskasia arintzeko eta ingurune urtarretako biodibertsitatea sustatzeko”. Bereziki anfibio eta burruntzien eta bestelako ornogabe urtar batzuen populazioen osasuna hobetu nahi du udalak. Orotara hogei urmael sortu dituzte orain arte, bederatzi lursailetan.
“Oso leku egokia da, ekobaratzeen parkea baitago bertan. Azken batean, parkeak oso
antzeko helburuak ditu, naturari, gure biodibertsitateari eta lehen sektoreari buruz
gehiago jakin eta ikasteko ohitura osasungarriak sustatzearekin lotutakoak. Gainera,
proiektua oso interesgarria iruditzen zaigu ikastetxeentzat, horrelako gaiei buruzko
edukiak bertatik bertara sakondu ahal izango baitituzte, eta, horrela, errazago ulertu”, esan du Borla Olazabal ordezkariak. Urmaela baratze parkearen “osagarri” bihurtuko dela erantsi du.
Urmaela bukatuta, heziketarako baliabide izango da hiriko ikastetxeentzako.
