Lurraldebus, Euskotren eta Renfeko tarifak merkatzeko proposatu du EAJk
"Edozein garraiobide hautatuz gero ere, eta betiere irungo barne ibilbideetan, irundarrek Irunbus-en tarifa bera ordaintzea (1,55 euro)" eskatu diote Gipuzkoako Garraioaren Lurralde Agintaritzari.
MUGI sisteman integratutako lau garraio zerbitzuen (Lurraldebus, Euskotren, Renfe eta Irunbus) prezioa bateratzeko eta bermatzeko proposamena egin berri du EAJ taldeak. Tarifa guztiak prezio berean jartzeko premiaz aritu dira, “hiriko puntu batetik bestera joateko erabiltzen den garraiobidea edozein dela ere, irundarrek beti tarifa bera ordaindu dezaten MUGIren sistemaren barruan”.
“Zerbitzu beragatik gehiago kobratzea ez zaigu guztiz zentzuzkoa iruditzen. Errealitate hori, gainera, oztopoa da edonorentzat garraio publikoaren eta iraunkorraren aldeko hautua egiteko”, esan dute jeltzaleek.
Horregatik, Gipuzkoako Garraioaren Lurralde Agintaritzari “edozein garraiobide hautatuz gero ere, eta
betiere irungo barne ibilbideetan, irundarrek Irunbus-en tarifa bera ordaintzea (1,55 euro)” eskatu diote. Era beran, beste hiru zerbitzuen tarifak Irunbus-eko tarifekin parekatzea planteatzen duen mozio bat ere erregistratu berri du taldeak.
“Proposamen honekin, EAJtik mugikortasun iraunkor eta eraginkorraren alde, garraio publikoa klima aldaketaren aurka indartzearen alde, eta gizarte kohesioaren alde egiten dugu. Garraioen arteko koordinazioa eta berdintasuna bermatzea erakunde publikoen betebeharra da”, erantsi dute.