"Elikadura osasungarria, era azkar, sinple eta erosoan eramateko" aukera eskainiko du Larreak
KM 0 eta Zero Zabor filosofien bueltan egingo dute lan, "kontsumo arduratsua eskura jarri" nahi baitute. Larunbatean inauguratuko dute Larreaundi kalean aurki daitekeen denda.
Bertako ekoizleei garrantzia eman nahi diete. Larrea Janariak izeneko proiektua jaio da Irunen, larunbatean (hilak 5) inauguratuko dutela iragarri dute BDS Koop eraldaketa fabrikako kideek. Bertan, proiektua ezagutu eta sortzaileekin hitz egiteko aukeraz gain, proiektuak hemendik aurrera eskainiko dituen jakiak dastatzeko aukera izango da. Eguzkitzaldean aurki daiteke denda jada, Larreaundi kalean hain zuzen.
Bertan kozinatutako janari prestatua eskainiko duen denda izango da Larrea, “elikadura osasungarria, era azkar, sinple eta erosoan eramateko aukera” eskaini nahi baitu. “Geroz eta gehiago dira era osasuntsu eta orekatuan jateko kezkatzen direnak, baina ez da erronka erreza. Erosketak egin, prestatu, tupperra prestatu, ez etxean ahantzi eta gero ontzia etxera bueltan ekartzeaz oroitzea, eguneroko erronka da askotan”. Finean, elikadura, kontsumo eredu eta kontziliazio arazoei erantzuteko sortu dute Larrea.
Bertako kalitatezko produktuak erabiliko dituzte, eta Irunen bertan kozinatuko dute dena. Ondoren, online eskaeraren bidez etxean bertan zuzenean jasotzeko aukera ere eskainiko diete herritarrei. Betiko errezetak, plater orekatuak eta sukalde osasungarriak topatuko dituzte herritarrek. “Denontzako da Larrea, janari berriak probatu nahi dituztenentzako, beren burua zaindu nahi dutenentzako edo erosketak egin, sukaldatu eta eguneroko menua egiteko denborarik ez duten, edo sukaldea maite ez duten horientzako ere bai. Kezkatu gabe ongi eta osasungarri jateko aukera ziurra”.
KM 0 eta Zero Zabor filosofien bueltan egingo dute lan, “kontsumo arduratsua eskura jarri” nahi baitute. Horretarako, bertako produktuak erabiltzeaz gainera, erabilera anitzeko ontziak edota erabilera bakarreko ontzi konpostagarriak erabiliko dituzte, “ongi eta errez janez ingurugiroa zaintzea posible delako” hain ustez.
Denda astelehenetik larunbatera zabalik egongo da, hilaren 8tik (asteartea da) aurrera. Bestela, webgune honetan topatu daiteke. Larunbateko inaugurazioa aldiz, 12:00etan izango da.
