Bakarrik bizi diren 75 urtetik gorakoen egoera sozio pertsonala aztertuko du udalak
Osasun, gizarte eta ekonomia premiak ikertuko dituzte, eta arrakala teknologikoa ere jorratuko duten gaietako bat izango da.
Joan den astean egin zuten honen berri emateko agerraldia. IKEI Zuzendaritza eta Analisi Sozioekonomikoko Aholkularitzak hiriko 75 urtetik gorako pertsonen beharrei buruzko azterlan bat egingo du, Hondarribiko Udalak hala eskatuta. Horri buruzko xehetasunak emateko agerraldia egin zuten joan den astean Gotzone Larrarte Gizarte Zerbitzuetako zinegotziak eta Laura Gallo eta María López IKEIko ordezkariek.
Ikerketa honen xedea, 75 urtetik gorako hiritarren “egoera sozio pertsonala lehen eskutik” egiaztatzea dela azaldu du Larrartek, “kolektibo hori gizarte-zerbitzuetara hurbiltzeko eta informatzeko”. Era horretan, udaleko gizarte zerbitzuei buruz duten ezagutza zein den jakin nahi dute, eta informazio horren berri emango diete ere.
Lanketa aste honetan hasiko dutela jakinarazi du Lopezek, eta otsaila eta martxoa bitartean landa lana amaituta izatea aurreikusten dute. Metodologiaren barruan, telefono bidezko inkestak egingo dituzte, baita hautemandako premiei buruzko hausnarketa egiteko eskatu ere, “osasun, gizarte eta ekonomia premiei buruzkoa, eta arrail digitala bereziki azpimarratzea”. Gaur egun, 75 urte baino gehiagoko 573 pertsona bizi dira bakarrik Hondarribian.
2020eko konfinamendu garaian, udala 65 urtetik gorako pertsonekin harremanetan jarri zirela oroitarazi nahi izan du Larrartek: “Lan-mahai bat jarri dugu martxan, Nagusilan, Afagi eta Kasino Zaharra elkarteek parte hartzen dutelarik”. Azterketa bukatzerakoan, dokumentazio guztia udalari emango diote, eta hau udaberri aldera izatea aurreikusten du Lopezek.
