Elkarrekin Podemos: "Kirurgia blokeko proiektua geldiarazi behar da"
Osakidetzak herritarren eskaerei entzungor egin eta birmoldatze planarekin aurrera egiten jarraitzea salatu du koalizioak.
Bidasoa Ospitaleko kirurgia blokea birmoldatzeko proiektua geldiarazteko eskatu du Elkarrekin Podemos IUk. 
Eusko Jaurlaritzak “gizartearen aldarria entzun” eta Bidasoa Ospitaleko kirurgia blokea birmoldatzeko proiektua geldiaraz dezan eskatu du Irungo Elkarrekin Podemos IUk.
Koalizioak salatu du Osakidetzak aurrera jarraitzen duela birmoldatze planarekin, eta “ez diela jaramonik egiten” osasun langileen, gizarte kolektiboen, eta orobat, bizilagunen kexa eta kezkei.
Publikoki babesa adierazi dio udal taldeak Osasun Bidasoa plataformari: “Bat egiten dugu Bidasoako Ospitalean bloke kirurgikoa mantentzeko eskakizunarekin obra egiten den bitartean”. Eskaera atzo bertan helarazi zion David Soto legebiltzarkideak Gotzone Sagardui Osasun sailburuari.
Gogora ekarri dute obra geldiarazteko eskatzeko adierazpen instituzional bat kaleratu dela berriki udalbatzako alderdi guztien babesarekin, EAJrena izan ezik. David Nuño bozeramaileak erabakia gaitzetsi du: “Eusko Jaurlaritzaren eta Sagarduiren okultismoa eta informazio falta salatu besterik ezin dugu egin”.
