Lau urtaroak jaso nahi ditu udalak 2023ko egutegian
Aurten epea azarora arte luzatzeko erabakia hartu dute, "herritarrei aukera emateko urte osoan zehar argazkiak egin eta bidaltzeko".
Irungo Udalak dagoeneko datorren urteko egutegiak izango duen itxura erabakitzen hasi nahi du. Horretarako, jakinarazi du dagoeneko argazkiak bidaltzeko epea zabaldu dutela. Beste urte batez, AFI elkartearekin elkarlanean ariko da udala, eta honek eskatu du bidaltzeko epea luzatu dezatela, “herritarrei aukera emateko urte osoan zehar argazkiak egin eta bidaltzeko”.
“Askotan egiaztatu ahal izan dugu iristen ziren argazki gehienak urteko azken garaikoak zirela, justu irudiak jasotzeko irekitako garaikoak eta batez ere Irun neguan eta udazkenean erakusten zigutela”, esan du Gerardo Garcia Irungo Argazki Elkarteko presidenteak.
Hala, aurtengoan urtaro guztiak jasoko nahi dituzte, Lau urtaroak Irunen izenburua izango du 2023ko egutegiak.
Urte amaieran jasotako irudi guztietatik 13 aukeratuko dituzte, hilabete bakoitzeko bat eta azalekoa. Azaroaren 19a izango da bidalketak egiteko azken eguna.
