Behobia izango da hurrengo auzo sortzailea
Otsailaren 11n auzotarren proposamenak jasoko dituzte. Gero, Irantzu Lakua artista arduratuko da bitartekaritzaz eta dinamizazioaz, eta nola ez, lan artistikoaz.
Behobia auzoa izango da Auzo sortzailea egitasmoaren hurrengo geltokia. Irantzu Lakua artista gasteiztarrak gidatuko du prozesua, eta aurreko hiru edizioetan bezalaxe, auzotarrak izango dira protagonistak. Hala, lehen bilera bat egingo dute hilaren 11n, 19:00etan, auzo elkartearen lokalean.
“Programa honen laugarren edizioa da jadanik, eta kultura Irungo auzoetara eramateko gure konpromisoari erantzuten jarraitzeko itzuli da. Zorioneko gaude. Bueltan da auzoko espazioak arte garaikidearen bidez dinamizatzeko programa hau. Kontua da parte hartzaileek ideiak proposatzea, gero artista eta bitartekaritza kulturaleko lantaldea arduratuko dira ideia horiek gauzatzeaz. Emaitza, gainera, onuragarria izango da auzoarentzat”, esan du Juncal Eizagirre ordezkariak.
Lakuak hiriko mugen gaia landu nahi du laugarren honetan, “muga horiek lotura bihurtzeko”. Hasieratik parte hartuko du prozesuan, bera arduratuko da bitartekaritzaz eta dinamizazioaz, eta nola ez, lan artistikoaz.