Sarah Grandes artista irundarraren erakusketa, Gaztelekuan
Collage motako 16 argazki bildu ditu, eta pasaia serie oso bat sortu du gorputz atalekin osatua. Argazki bakoitzak poema bat eramango du, Grandesek berak idatzia.
Quispy Kay-ren argazki bat. 'Azala'. Sarah Grandesen(Irun, 1995) Qispy Kay erakusketa izango da gaurtik otsailaren 26ra, Gaztelekuan. Bilduma hori 16 collage erako argazkiz osatuta dago. Gorputz atalekin osatutako paisaiak eraman ditu erakusketara irundarrak, ukitu surrealista batekin. Irudi bakoitzak alboan testu edo olerki bat eramango du, artistak berak idatzitakoa.
Hasiera batean, formatu analogikoari heldu bazion ere, digitalera jauzi egin zuen ondoren. Horrek aukera eman dio xehetasunekin lan egiteko: zimurrak, tolesturak, poroak, orbanak, ileak… Argazkiak hainbat tamainatan daude: A4, A3…
Grandesek aurretik egindako lanen artean, Emigrazio eraikineko horma irudia aipatu daiteke, San Migelen.
Gazteartean Krea
Qispy Kay erakusketa Irungo Udalaren Gazteartean Krea programaren barruan antolatu dute. Egitasmo horrek hiriko artista gazteak hasiberriak ezagutzera emateaz gain, gazteen artean sormena eta interes artistikoak sustatu nahi ditu. Halaber, nerabeen eta artista gazteen arteko ikaskuntza partekatua ahalbidetu nahi du.
Santi Jimenez Gazteriako ordezkariaren esanetan, gazteek badute zer esan, eta horrelako ekimenak “oso aproposak dira haiek kezkak eta ideiak bideratzeko”.
Aurten bost erakusketa finkatu dituzte programaren barruan, baita tailerrak eta laguntza artistikoko bi ekintza ere.
Grandesen bildumaren bisita birtuala egin daiteke irun.org/gazteleku atalean. Erakusta horren ondoren, Martxoaren 8ari buruzko beste erakusketa bat martxan jarriko dute, Gaztelekuan.
