Kasino Zaharra ezin irekitzearen arrazoiak eman ditu udalak
Bertako zuzendaritza batzordeak hauteskundeak deitu ditu, komisio hori osatzeko. Bien bitartean, itxita jarraituko du adinekoen etxeak.
Joan den astean, Kasino Zaharra Adinekoen Etxea irekitzea eskatu zuen Abotsanitzek, eta gaur, itxita jarraitzearen arrazoiak eman ditu Gotzone Larrarte Gizarte Zerbitzuetako zinegotziak.
Azalpenetan dio, etxearen kudeaketaz arduratzen den elkartearen zuzendaritza batzordea osatzeko arazoak dituztela. Joan den azaroaren 10eko ezohiko batzarrean zuzendaritza-batzordeko hiru kideren bajaren egoeraren berri eman zuten, eta legez hiru kiderekin elkarte gisa jarrai badezakete ere, boluntario berriak eskatzen zituzten, erakundeak martxan jartzeko egiten zuen lanagatik, eta kide dimisionarioak ordezkatzeko.
Bi boluntario aurkeztu zirela, baina batzarrak ez zituela onartu zehaztu du udal ordezkariak. Beraz, astelehen honetan, behin zuzendaritza batzordea osatzeko hauteskunde mahaia eratuta, hauteskunde partzialak hasi zirela jakinarazi du, eta ondorioz, etxearen irekiera eta elkartearen jarduerak atzeratu egingo direla esan du.
Orain arte kudeatu duen elkarteak lan horietan jarrai dezan, edo horren ardura udalarena izatea nahi duten galdetu zutela ere azaldu du zinegotziak; erantzuna bateratua izan zen: kudeaketa elkartearen eskuetan jarraitzea nahi dute: “Udalak une oro erakutsi dugu laguntzeko prest gaudela, baina elkartea bera da orain arte bezala lanean jarraitu nahi duena”.
Kasino Zaharra itxi zenetik, zuzendaritza batzordearekin bilerak maiztasunez egin dituztela dio Larrartek, eguneratze prozesuan laguntzeko asmoz, baita izapide administratiboetan ere. Horretaz gain, adinekoen lan mahaia osatzen duten elkarteekin eta eskualdeko beste gizarte eragile batzuekin batera, Adinberri buru duen proiektu batean parte hartu zutela esanez amaitu du ordezkariak.
