Jaizkibelgo ondare arkeologikoetan eragindako kalteak neurtu nahi ditu Abotsanitzek
Aldundiak egin zituen lan horiek abenduan, landaredi mozketa helburu zutenak. Gertatu zenaren espedientea galdegin du Abotsanitzek, hurrengo urratsa zein izango den erabakitzeko.
Ondare arkeologikoetako bat kaltetuta dagoenaren irudi hau zabaldu du udal taldeak. Jaizkibel mendian, iazko abenduan makinaria handiarekin egindako landaredi mozketa lanek sekulako suntsipena eragin zutela babestutako txilardietan eta ondare arkeologikoetan salatu du Abotsanitzek.
Mendia babestuta dagoela azaldu dute, bai Kontserbazio Bereziko Gune gisa, bai Natura 2000 Sarearen barruan dagoelako, eta Europako Habitaten Zuzentarauak eta Eusko Jaurlaritzak bertako habitata babesteko neurriak ezarri zituztelako.
Zentzu honetan, bertako kalteak baloratze aldera, Hondarribiko Ingurumen sailaren eta arkeologia teknikariaren txostena eskatu diote udalari eta aldundiari. Gertatu dena ezagutu nahi dutela adierazi dute, “zein urrats eman erabakitzeko”.
Era berean, ez dela lehen aldia aldundiak egindako garbiketa lanek Jaizkibelgo landaredia eta aztarna arkeologikoan kalteak eragin dituena oroitarazi dute.
