Aniztasun istorioz beteko dute Kabigorri ateneoa
Bihar inauguratuko duten erakusketan herrialde ezberdinetan jaiotako zein Irungo zenbait pertsonen bizitzak bilduko dituzte. Erakusketak "errealitatea estigmatizatzen eta alboratzen duen historia bakarrari aurre egin nahi dio, migrazioak eta aniztasunak dakarten aberastasun anitzak ikusezin bihurtuz".
Kabigorri ateneoak erakusketa berri bat inauguratuko du bihar (hilak 27), eta martxoaren 5era bitarte bisitatzeko aukera izango da. Aniztasun istorioak izeneko erakusketak hartuko du aretoa. Erakusketak, antolatzaileen arabera, “errealitatea estigmatizatzen eta alboratzen duen historia bakarrari aurre egin nahi dio, migrazioak eta aniztasunak dakarten aberastasun anitzak ikusezin bihurtuz”. Eta horretarako, herrialde ezberdinetan jaiotako zein Irungo (Lazkao, Zumaia, Eskoriatza, Hondarribia edo Donostiarekin batera) zenbait pertsonen bizitzak bilduko dituzte erakusketan.
“Aurkezten dugun istorio bakoitza berezia eta paregabea da, pertsona migratuak ere askotarikoak direlako. Bakoitzaren arrazoiak, egoerak eta ibilbidea aldatu egiten dira.
Hala ere, arrazakeria eta gorroto diskurtsoak hainbat modu eta intentsitatetan agertzen dira beren bizi-esperientzietan”, diote Kabigorriko kideek.
