Apirilaren 10eko lehen orduetan iritsiko da 22. Korrika Irunera eta Hondarribira
Irunera apirilaren 10eko 00:53an iritsiko da Hendaiatik. Hondarribian 01:39an izango da AEKren martxa erraldoia. Irunera atzera egin, eta Oiartzun aldera joango da Korrika.
22. Korrikaren antolakuntzak euskararen aldeko martxa erraldoiaren zirkuitu zehatzaren berri eman du gaur. Horren arabera, apirilaren 10eko 00:53an iritsiko da Irunera (Hendaiatik), ondoren Hondarribira (01:39) joateko. Atzera berriz ere egingo du Korrika Irunera (02:21), hiritik Oiartzun aldera joateko (03:09).
22. Korrika martxoaren 31n hasiko da Amurrion (Araba), eta hilaren 10ean bukatu Donostian, hain justu Irundik eta Hondarribitik pasako den egunean. Hala, Irun bigarrenez atzean utzi ondoren, Oiartzun, Errenteria-Orereta, Lezo, eta Pasaia zeharkatuko ditu AEKren herri iniziatibak. Donostiara 09:05an iritsiko da, eta bukaerako ekitaldia 12:30ean egitea aurreikusi dute.
