Estradizioaren egunean irundarren babesa jaso du Iratxe Sorzabalek
Gaur 11:30ean atera dute Iratxe Sorzabal Reauko (Frantzia) espetxetik, Espainiarako bidean. Elkarretaratzea egin dute arratsaldean irundarrek, San Juan plazan bildu dira.
150 bat lagun bildu dira. Gaur 11:30ean atera dute Iratxe Sorzabal Reauko (Frantzia) espetxetik, hala jakinarazi berri dio Iratxeren Lagunak taldeak HITZAri. Hortaz, gaurtik Espainiaren esku egongo da irundarra, eta Madrilgo espetxe batera eramango dutela uste dute Sorzabalen gertukoek eta Xantiana Cachenaut abokatuak.
Estradizioaren egun berean babesa eta elkartasuna bidali diote Sorzabali hamarka eta hamarka irundarrek San Juan plazan, Iratxe etxera! lemapean bildu dira; 150 bat lagun inguru elkartu dira. Datozen asteei begira mobilizazio gehiago egingo dituztela aurreratu du taldeak. Otsailaren 5ean manifestazioa egingo dute Irunen, San Juan plazatik abiatuta (18:00etan).
Behin Espainieratuta, kondena luze bati aurre egin behari zango dio ziur aski irundarrak. 30 urteko kondena betetzeko “arrisku erreala” duela dio Cachenaut abokatuak. Egoera hori emanez gero, Frankfurteko giza eskubideen gortera eramango dute afera. Epaiketa aldiz, otsailaren 7an eta 8an egingo dutela aurreratu du abokatuak.
