Errege Magoak eta postaria, pandemiara egokituta
COVID-19 gaitzak eragindako pandemiara egokitutako gutun bilketa egingo dute bihar, eta Errege Magoen bisita Jostaldin izango dela gogoratu du udalak.
Errege Magoak Jostaldin egongo dira umeen bisitaren zain.
Hondarribiko Udalak gogorarazi duenez, COVID-19ak eragindako pandemiara egokitutako gutun bilketa eta Errege Magoen bisita antolatu dituzte biharko eta etzirako, hurrenez hurren.
Zabaldutako informazioaren arabera, postariari gutuna emateko interesa duten haurrek ondoko ordutegi eta lekuetan egin dezakete: Mendelu Auzo Elkartean, 17:00etan; Amute-Kosta Auzo Elkartean, 17:30ean; udaletxeko arkupeetan, 18:00etan; eta Santa Maria Magdalenan, 19:00etan.
Errege Magoei dagokienez, aurten berriz ere, Jostaldi pilotalekura murriztuko dute bisita. 15:00etatik aurrera egongo dira bertan, baina udaletik gogoratu dutenez, ezinbestekoa da Arma Plaza informazio gunean gonbidapenak aldez aurretik jasotzea.
