Lehiaketara bueltatuko da gaur Bidasoa, Wisla Plocken kontra
Bi aste egin ditu kantxetatik kanpo talde irundarrak hainbat jokalarik positibo eman ondoren. Artalekun izango da lehia, 20:45etik aurrera.
Bidasoa Hainbat jokalarik positibo eman ondoren, bi aste kantxetatik kanpo pasatu ditu Bidasoak, eta gaur itzuliko da lehiaketara. Gaurkoan, European Leagueko partida jokatuko du etxean, Wisla Plocken kontra.
Klubak azaroaren 23an Suitzan Pfadi Winterthurren kontra zuen partida atzeratu zuen positibo horiek zirela eta. Horrez gain, beste lehia bat atzeratu behar izan zuen, Valladoliden kontrakoa.
Bidasoaren arabera, positibo emandako jokalariek “sintoma arinekin” pasatu dute birusa. Orain, bigarren froga guztiak negatibo eman eta Osakidetzako protokoloa bete ostean, bueltatzeko moduan da lehen taldea.
Horren harira, barkamena eskatu du eragindako kalteengatik, bai bi taldeei, EHF, ASOBAL eta RFEBMri baita jarraitzaileei ere. Azken horiek, gainera, Suitzara joanak zirelako partidua ikusteko asmoz.
Wisla Plock
Momentuz, bigarren tokian dago sailkapenean Wisla Plock. Bidasoak baino partida bat gehiago jokatu du, eta hiru garaipen eta porrot bat lortu ditu. Bidasoak, berriz, jokatutako hiru partidetatik bakarra irabazi du. Beraz, gaur, bi puntuak eskuratzea garrantzitsua izango da etxeko taldearentzat Europan jarraitu ahal izateko.
Jacobo Cuetara entrenatzaileak “arazoaren garrantzia” onartu du: “Azken asteetako lehiaketaren eta entrenamenduen erritmoa blokeatu du eta hori handicap garrantzitsua da errendimendu handiko lehiaketetan aritzeko”. Hala ere, taldea saiatuko dela esan du, “daudenak daudela, eta partidu honetan lortzen ez badugu, hurrengoan egingo dugu”. Izan ere, jokalari batzuk gutxi entrenatuta iritsiko dira partidura, eta beste batzuk, berriz, zuzenean. Konpetizioaren erritmora egokitu beharko dutela gaineratu du, “lehiaketa bera izango da entrenamendua”.
“Artalekuko indarra” inoiz baino beharrezkoagoa izango dela adierazi du Bidasoak. Bazkideek dagoeneko aukera dute Bazkidearen Gunean sarrera deskargatzeko. Azken bi asteetan sortutako arazoak konponduta daudela azaldu du klubak, baina norbaitek oraindik zerbait argitzeko izanez gero, bazkideak@cdbidasoa.eus-era idazteko eskatu du.
