Gabonetako azoka egingo dute datorren asteburuan, Jostaldin
Hondarribiko merkatarien postuez gain, haurrentzako jarduerak, Olentzeroren txokoa, ihes gela... izango dira merkatuan.
Gabonetako merkatua Jostaldin egingo dute.
Gabonetako azoka hartuko du Jostaldi pilotalekuak hilaren 11n eta 12an, datorren asteburuarekin batera. Hondarribiko merkatariek hamabost postu beteko dituzte, eta horrez gain, txikiei zuzendutako jarduerak, Olentzeroren txokoa, ihes gela, puzgarrien txokoa, ipuin kontaketak eta tailerrak izango dira, Maria Serrano Merkataritza zinegotziak ezagutarazi duenez.
Merkatuak 11:00etatik 14:00etara eta 16:00etatik 20:00etara zabalduko ditu ateak. Ordutegi horren baitan, larunbaterako, 11:30etik 12:30era 3 eta 6 urte arteko haurrentzako ipuin kontaketa antolatu dute; ondoren, 12:30ean, 7 eta12 urte artekoena hasiko da. Arratsaldean, bestalde, Gabonetako apaingarriak egingo dituzte 5 urtetik gorako umeek (16:30). Helduentzako eskaintza ere aurreikusi dute, eta 19:30ean azalaren zaintzaren inguruko tailerra egingo dute.
Igandeari dagokionez, Gabonetako apaingarriak egingo dituzte 5 urtetik gorakoek; zehazki, 11:00etatik 11:45era eta 12:00etatik 12:45era. Helduek, bestalde, mahai zentroak egiten ikasteko aukera izango dute 17:30etik 18:30era.
Serranok nabarmendu duenez, jarduera guztiak debalde diren arren, izena ematea ezinbestekoa da. Aurki zabalduko du udalak egitaraua bere webgunean, bai eta hondarribiarren postontzietan ere.
