Irundarren artean erreferentziazkoa bilakatzen
Ireki zutenetik bi urtera egonkortutako egitasmoa da Labore Txingudi. 200dik gora bazkide ditu dagoeneko, eta hiritarren artean gero eta onespen handiagoa du establezimenduak.
Gero eta auzotar gehiago dira Laboreren dendan erosketak egiten dituztenak. Labore Txingudiko denda berriak bi urte bete ditu jada, 2019an egin zuen egitasmoak tokiko eta garaiko produktu ekologikoak herritarrengana hurbiltzeko apustua. Ordutik etengabeko gorakako bilakaera izan du. Egun «egonkortutako proiektua» dela esan dezakete kooperatibako kideek. Orain, pauso bat gehiago eman nahi dute.
Laboreko kide Iker Eizagirrek azaldu du egonkortasun hori bai bazkide zein errentagarritasunaren aldetik lortu dutela. Egun, 218 bazkide ditu egitasmoak, baina horietatik harago, bizilagun asko dira egunerokoan bertan erosketak egiten dituztenak. «Bi urte hauen balorazioa oso baikorra da. Konplexua izan da, baina zorionez txoko bat egitea lortu dugu Irunen. Labore ez da denda bat soilik, eta asko dira proiektura gerturatu direnak dendari esker». Izan ere, dendan erosi ahal izateko ez da beharrezkoa bazkide izatea, horregatik ere gorakada hori sumatu dute, kurioso asko sartu baita, eta bazkide fidelak bilakatu dira bertan aurkitutako eskaintza zabalari esker. Egunetik egunera handitzen ari da eskaintza hori.
Dena den, euren asmo nagusia ahalik eta bazkide gehien lortzea da. Horregatik, hil honen bukaeran bazkidetza kanpaina abiatuko dute, eta ez soilik dendan zer aurki daitekeen azaltzeko. Laboreren atzean dagoen lan kooperatiboa herritarrei gerturatu nahi diete bereziki. «Gure betiko asmoa ere izan da masa kritikoa lantzen jarraitzea, herritarren artean kontzientzia hori piztea».
Pedagogia kanpaina
Bazkidetzarenarekin batera, pedagogia kanpaina bat abiatuko dute hil honetan. «Pandemiarekin ikusi dugu zer nolako menpekotasuna dagoen, zer gerta daitekeen elikadura suministroaren kate globalak apurtzen direnean. Egun batzuetan elikagai asko falta ziren. Horrek arrazoi gehiago eman dizkigu honen aldeko apustua egiteko, ezinbestekoa baita». Tailerrak, mahai- inguruak eta bestelakoak antolatuko dituzte.
Horiek hasi bitartean, galdetegi bana erantzuten hasi dira bazkideak, nolako Labore nahi duten jakiteko. «Proiektua herritarrentzako irisgarriagoa izatea nahi dugu, guztion artean osatu dezagun
