Estatuko Aurrekontu Orokorretan hiriari lotutako bi zuzenketa sartu ditu EAJk
Irungo trenbideko hondartza estaltzeko eta hiriaren erdialdea Anaka auzoarekin lotzeko proiektua idazteko eta Plaiaundi Parke Ekologikoaren ibarra zaharberritzeko zuzenketak sartu dituzte.
Azken asteetan egindako akordioei esker, hiriko trenbide eremuan erabilerarik ez zuten hainbat lursail udalaren esku daude. Irungo EAJ taldea pozik agertu da, jeltzaleen Diputatuen Kongresuko taldearekin elkarlanean bi zuzenketa sartu ahal izan baitituzte Estatuko Aurrekontu Orokorrean. Alde batetik, Irungo trenbideko hondartza estaltzeko eta hiriaren erdialdea Anaka auzoarekin lotzeko proiektua idazteko zuzenketa, eta bestetik, Plaiaundi Parke Ekologikoaren ibarra zaharberritzeko 1,55 miloi euroko zuzenketa.
“2019an proposatu genuen bezala, hiriaren bi aldeak elkartzea, hiria bitan banatzen duen arrakala ezabatuz, funtsezkoa da, eta gainera, Irungo Hiri Antolamenduko Plan Orokorrean ere proposatu zen”, esan dute Irungo taldeko kideek. Amaitzeko, “ingurumena zaintzen duen, jasangarria den eta konexio hobeak lortzen dituen hiri baterantz heltzeko lan egiten jarraituko” dutela gaineratu dute jeltzaleek.
