Haurren ongizatearen gaineko topaketa egingo dute hilaren 20an
Laugarren edizio honetan haurren garapenean laguntzeko funtsezko gaiak landuko dituzte. Tailerrak, hitzaldiak eta mahai inguruak egingo dituzte haur zein gurasoekin.
Haurren ongizateari buruzko laugarren topaketa bat antolatu du Irungo Udaleko Gazteria sailak hilaren 20rako (larunbata da) Palmera Montero Gunean. Haurren Eskubideen Adierazpenaren esparruan egingo dute topaketa, Haurren Nazioarteko Egunean hain zuzen. Laugarren honetan haurren garapenean laguntzeko funtsezko gaiak landuko dituzte.
“Pozik gaude haurtzaroko ongizateari buruzko topaketa hau berriz aurkeztu ahal dugulako; izan ere, Gazteriako ordezkaritzarentzat funtsezkoa da gure adin txikikoei beren garapen sozial eta fisikoan laguntzea, eta are gehiago oraingoan, gure haurrei ere eragin dien pandemia igaro ondoren”, esan du Santi Jimenez ordezkariak gaurko aurkezpenean.
Finean, “haurren heziketarekin eta ongizate emozionalarekin zerikusia duten funtsezko gaiak” landuko dituztela gaineratu du ordezkariak, eta ezarritako helburu nagusia, haurrei garapen fisikoan, emozionalean, kognitiboan eta sozialean laguntzeko erantzukizunak dituzten pertsonei errespetuz hezteko tresnak ematea izango da.
Topaketan bi hitzaldi, mahai inguru bat eta arte adierazpeneko lantegi bat egingo dute, haur zein gurasoei begirakoak.
Topaketak iraun bitartean haurtzaindegi zerbitzua egongo dela aurreratu du udalak, 4 urtetik 8ra bitarteko haurrak dituztenentzat. Doakoa izango da, baina izena eman beharko da aurretik, webgune honetan.
Ondorengoa da hilaren 20rako prestatu duten programa:
- 09:45: Harrera.
- 10:00: Aurkezpena.
- 10:15-11:45: Diana C. Jimenzen hitzaldia, haurtzaro positiboaz.
- 11:45-12:15: Atsedenaldia.
- 12:15-13:45: Montse Vilaren hitzaldia. Coach kudeaketa emozionalean aditua da,
idazlea eta Haur Hezkuntzako teknikaria. - 13:45-15:00: Bazkaltzeko atsedenaldia.
- 15:00-16:30: Haurrak zaintzeko erronkak koronabirusaren
ondoren izeneko mahai ingurua, Diana C Jimenz eta beste zenbait adituren eskutik. - 16:30-18:00: Mafalda Saloio izeneko familia arteko tailerra.Tailerrean, antzerkiak eta dantzak eskaintzen dituen gorputz adierazpenaren bidez seme-alabekin elkartzea eta harreman gozoa lortzea da asmoa, “topaketa modu positiboan eta askatzailean amaitzeko”.
