60.000 eurotik gora jasoko ditu Irunek Genero Indarkeriaren kontrako Estatu Itunetik
EAEko udalerri guztiek jasoko dituzten 3.000 euro finkoez gain beste 57.000 jasoko ditu udalak, biztanle kopurua kontuan izanik. Indarkeria matxistaren kontra bideratutako programa eta proiektuak finantzatzeko erabiliko dute.
Udaletxeak itxura hau hartu du gaurko aldarrikapen egunerako. Indarkeria matxistaren kontrako proiektu eta programak finantzatzeko Irungo Udalak 60.000 euro baino gehiago jasoko ditu, Espainiako Gobernuko Berdintasun Ministerioak udalei Genero Indarkeriaren kontrako Estatu Ituna garatzeko egingo diren ekarpenen barruan. Gipuzkoan orotara 891.542,66 euro banatuko ditu, 3.000 herri bakoitzeko, baina Irunek beste 57.000 euro jasoko ditu, biztanle kopurua kontuan izanik.
Miren Etxebeste udaleko Berdintasun saileko ordezkaria pozik agertu da albistearekin. “Genero indarkeriaren kontrako borroka, dudarik gabe, Arloaren jardunaren ardatz nagusietako bat da. Funts hauek jasotzea oso berri ona da, Irungo Udala lehendik egiten ari den lanean aurrera egiten lagunduko baitu”, esan du ordezkariak.
Funts horiek indarkeria matxistaren kontra bideratutako programa eta proiektuak finantzatzeko erabiliko du udalak, hala nola emakumeen kontrako indarkeria mota oreren kontrako sentsibilizazio eta prebentzio kanpainak egiteko eta gaiaren gaineko informazioa emateko materialak prestatzeko.
