Afororik gabe eta zutik egingo dute biharko Fenomena
Osasun larrialdi egoera bertan behera utzi ondoko lehen musika jaialdia izango da biharko Fenomena; 13:30etik aurrera musika doinuek kirol kaia beteko dute.
BIhar egingo dute 2021eko Fenomena.
«Iaz bezala murrizketa kontuekin ezin izan ditugu nahi genituen artistak ekarri, gehienbat talde atzerritarrei dagokienez», azaldu zuen Villarrek. Hala eta guztiz ere, «kartel erakargarria eta kalitatezkoa» osatu dutela ziurtatu zuen «talde bakoitzak bere nortasuna duelako». Gainera, kideak nabarmendu zuenez, pandemia ondoko aro berriko lehenengo jaialdia izango da. Kultur eragile eta langileek bizitako egoera ere gogora ekarri zuen, pandemiako sektore kaltetuenen artean egoteagatik.
Joseba Irazoki eta Lagunak, Adios Amores, Vulk, Chaqueta de Chandal eta Noier Socha taldeek osatzen dute aurtengo kartela. 13:30etik aurrera entzungai izango dira haien doinuak kirol kaian. Aire librean izango dela eta eguraldi ona iragarri dutela nabarmendu zuten bultzatzaileek.
