Amaitu dute espaloietako koskak kentzeko kanpaina
Oinezkoen pasabideak hobetzeko lanak egin dituzte hiriko zenbait puntutan, haiek egokituz eta pasabide berriak sortuz.
Hiriko oztopo arkitektonikoak edo espaloien koskak kentzeko kanpaina amaitu berri du udalak, hala jakinarazi du Obra sailak. Oinezkoen pasabideak hobetzeko zenbait lan egin dituzte, haiek egokituz eta pasabide berriak sortuz.
“Aldian-aldian egiten dira horrelako kanpaina berriak, eta, batzuetan, herritarrek eskatzen dituzte, aurrekontuak parte hartzearen bidez egiteko prozesuen esparruan adibidez, kasu honetan bezala.
Lanak formatu txikikoak izaten dira, baina balio handia dute, oinez mugitzea errazten eta arazoak saihesten baitituzte, mugitzeko gaitasun murriztua dutenei dagokienez batez ere”, azaldu du saileko ordezkari Cristina Labordak.
Hiriko oinezkoen pasabide gehienetan espaloia beheratuta zegoen, eta horrek oinezkoen ibilian zailtasunak sortzen zituen. Bada, puntu hauetan esku hartu du udalak: Santiago-Dunboa inguruan eta Txoantenea, Victoriano Juaristi eta Tonpes kaleetan. Lanetarako 42.558,94 euroko inbertsioa egin du udalak.
