"Irungo ikastetxeetan ikasturtea iazko arazo zaharrekin hasi da"
Hezkuntza Plazara iniziatibak hiru arazo salatu ditu: irakasle falta, instalazio arazoak eta COVID-19arekin jartzekoak ziren karpak oraindik ez muntatu izana.
Covid-19a dela eta, karpa bat ikastetxe batean jarrita ikasleek patiora aterateko aukera izan dezaten euria egiten duenean. Hezkuntza Plazara iniziatibak 2021-22 ikasturtea “iazko arazo zaharrekin” hasi dutela salatu du, eta horren erantzule Eusko Jaurlaritzako Hezkuntza Saila eta Irungo Udala egin ditu: “Argi eta ozen esan nahi dugu ez dutela bere hitza bete”. Bi administrazioak bakoitza bere ardura mailarekin “berandu eta gaizki” ibili direla gaineratu du.
Hiru arazo nagusi aipatu ditu iniziatibak. Hasteko, ikasturtea hasita zegoela, irakasleak falta zirela esan du. Zehazki, “20 irakasletik gora” berandu iritsi direla azaldu du, eta ikasle asko tutorerik gabe egon direla. Gainera, Jokin Bildarratz Hezkuntza Sailburuak “behin eta berriro” aipatutako COVID-19ko errefortzu irakasleak irailaren 14ean heldu zirela kritikatu dute, “ikasturtea dagoeneko hasita”. Bestalde, ordezkapen asko ere ez direla egin gaineratu du.
Beste puntuetako bat instalazioak izan dira. Aurretiaz zeuden arazoak COVID-19arekin “areagotu” egin direla esan dute, eta ikastetxe batzuetan espazio falta dela eta liburutegian edo ikasgeletan bazkaltzen ari direla. Toki Alai zentroko egoeraren berri eman du, eta moduloak “berandu” jarri dituztela esan dute, ikasleak dagoeneko ikasgeletan zeudenean.
Horrez gain, euria egiten duenean oraindik ikasleek ezin dutela patiora irten kritikatu du, udalak “lau haizeetara” zabaldutako karpak ez daudelako jarrita, nahiz eta “iraila osoa” pasatu den.
Egoera horren aurrean, bi administrazioei “arazo larri horiek ahalik eta laster konpontzea” eskatu diete eta beren ardurak hartzea. Mobilizatzera irteteko aukera ere mahaiaren gainean jarri du, “komunitatearen kezka eta ezinegona mantentzen bada”.
Azkenik, hezkuntza komunitatea saretzeko deialdia egin du, eta hurrengo batzar irekia hilaren 20an egingo dutela jakinarazi du, Palmera Monteron.
