Delitu txikiak ugaritu direlako, bilera egin du Santanok poliziarekin
400 gertakaritik gora zenbatu dituzte Ertzaintzak eta Espainiako Poliziak. Santanoren esanetan, "neurri irmoagoak hartu eta horrelako delituak eteteko garaia da".
Irungo Udalaren arabera, hirian segurtasun falta dagoen sentsazioa areagotu egin da azken hilabeteeotan, eta, orain, datuek sentsazio hori egiaztatu dutela esan du: 400 gertakari zenbatu dituzte, eta horrek 2020arekin alderatuta, %35,5 eko igoera egon dela adierazten du.
Datu horiek udalak Ertzaintzarekin eta Espainiako Poliziarekin egindako bileratik atera dira. Jose Antonio Santano alkatea “kezkatuta” azaldu da ugaritze horren aurrean, eta delitu gehien antzeman diren auzoetako merkatari nahiz auzo elkarteekin ere bildu da. Santanok ondorioztatu du nahiz eta delituak, oro har, larriak ez izan “segurtasun faltaren sentsazioa” eragiten dutela. Horri aurre egiteko “neurri irmoagoak hartu eta horrelako delituak eteteko garaia” dela adierazi du.
Aurrera begira, polizia kidego guztiarekin biltzeko asmoa agertu du alkateak. Delitugieei dagokienez, “legedia behin eta berriro urratzen duten pertsonak diren sentsazioa” dutela zehaztu du; alegia, “lapurreta txikiak egin edota larritasun txikiko istiluak” eragiten dituzten ohiko delitugileak, eta atxilotuak izan eta ordu gutxiren buruan berriro kalean daudenak. Santanoren esanetan, horiekin “zorrotzago” jokatu beharko litzateke egoerari buelta emateko. “Egoera etsigarria da denontzat”, gaineratu du.
