Sarek deituta, "bizi osoko" kartzela zigorrak salatuko dituzte bihar
Euskal presoei ezarritako salbuespeneko kartzela zigorrak salatzeko deialdia, Arrasaten izatetik, Euskal Herriko plaza guztietan izatera pasa da. Bihar, hortaz, eguerdiko 12:00etan bilduko dira San Juan plazan.
Salbuespeneko kartzela zigorrak salatuko dituzte, bihar, San Juan plazan.
Biharko deitua zuen martxa Arrasateko Sarek, euskal presoei “salbuespen izaerarekin” aplikatzen zaien “bizi osoko” kartzela zigorra salatzeko asmoz. Antolatzaileek adierazi dutenez, “presio izendaezina jasan” dute deialdiagatik, eta, beraz, bertan behera utzi dute Arrasateko manifestazioa eta Euskal Herriko plaza guztietara eramango dute aldarria.
Presioa, izan ere, Sarek azaldu du hainbat “sektore mediatiko eta politiko batzuetatik, baita instituzional batzuetatik” aldarrikapena “hutsaltzeko” eta “kriminalizatzeko” saiakerak egin direla.
Sarek jakinarazi duenez, orain, 15 preso daude 40 urteko zigorra betetzera kondenatuta daudenak, 7/2003 Legea aplikatuta: “Kondena horiek espetxeen arloko araudian ezarritakoaren kontrakoak dira, araudi horrek ezartzen baitu askatasunaz gabetutako pertsonak birgizarteratzea izan behar dela helburua”.
“Bizi osorako zigorrik ez! Giza Eskubidea, elkarbizitza, konponbidea” lelopean abiatuko dira, eta, Irunen, hortaz, bihar (hilak 18) San Juan plazan elkartzeko deia egin du Irungo Sarek, eguerdiko 12:00etan.
