Txingudi Korrikak trafiko aldaketak eragingo ditu
Larunbat honetan, 15:55etik 17:15era, hiriko sarbide guztietan ibilgailuen trafikoa moztuko dute. Autobus zerbitzuek ere aldaketak jasango dituzte.
Larunbat honetan (hilak 18) Txingudi Korrikak hiria hartuko du, eta udalak jakinarazi du 15:55etik 17:15 ingurura ibilgailuen trafikoa moztuta egongo dela hiriko sarbide guztietan. Hortaz, honako kale hauek aldaketa horren eraginpean geratuko dira: Hondarribia kalea, Kolon pasealekua, Gipuzkoa hiribidea eta Iparralde hiribidea.
Epe horretan, Mendibilen, Cipriano Larrañagan eta Miguel de Astigar kaleen inguruan bizi direnek Iparralde hiribidetik sartu beharko dute Eloy Iglesias-Nicolas Guerendiain-Policarpo Balzola eta Zuberoa kaleetarantz. Zuberoa kaleak igo zein jaisteko pasabide alternatibo bat izango du, sarbidea errazteko. Irteera berriz, Cirpiano Larrañaga kaletik, Zabaltzatik, Argentinar Errepublika kaletik edo Maritxu Anatol kaletik egin beharko dute herritarrek, Iparralde hiribiderantz hain zuzen. Bestalde, erdialdean bizi diren irundarrek Gipuzkoa hiribidetik, Luis Marianotik edota Nafarroa hiribidetik sartu ahal izango dira.
Autobusen zirkulaziorako norabide bikoitzeko errei alternatibo bat egokituko du udalak Kolon ibilbidean, Iparralde hiribidearen eta Txanaleta plazaren arteko bide zatian. Hondarribirantz berriz, orain ezarrita dagoenaren pareko espaloian egin beharko dute geldialdia.
L1 (Zaisa-Ospitalea), L2 (San Juan-Katea-Txingudi), L3 (San Juan-Artia) eta L4 (San Juan-Anzaran-Olaberria) autobus zerbitzuek zenbait aldaketa jasango dituzte. L1 linean Zabaltzako, Euskotreneko, Hondarribiko, Gibeletako, Hirubideko eta Puianako geltokiak kenduko dituzte; L2-an Zabaltzako eta Topoko geltokiak kenduko dira; L3ak ez du aldaketarik jasango eta L4an Zabaltzako, topoko, Urruña plazatxoko, Lope de Irigoyen 31ko, Zubiaurreko, Kolon 43ko, Gipuzkoa 6ko eta Gipuzkoa 32ko geltokiak kenduko dira.