Gabonetan ohikoak izan diren jardueren espiritua berreskuratu nahi dute, eta horretarako inbertsio handiagoa egingo dute aurten.
Irungo Udala dagoeneko aurtengo Gabonei begira jarri da, eta merkataritza biziberritzeko antolatutako kanpainaren berri eman dute gaur Jose Antonio Santano alkateak eta Junkal Eizagirre ordezkariak. Bidashop, Mugan eta Denok Bat elkarteekin batera osatutako kanpaina “historikoa” izango dela esan dute lehenik. “Badakigu denbora falta dela oraindik, baina lantzen ari garen ideien berri eman nahi dugu. Horien xedea hiria biziberritzea da, bai eta une zailak bizitzen ari diren sektoreei
babesa ematea ere, hala nola merkatari txikiei eta ostalariei. Pandemia egoera betean gaudela ahaztu gabe, eta beharrezko segurtasun neurri guztiak kontuan izanda, inoiz ez bezalako programazio ilusionagarri bat antolatuko dugu, hirian gozatzeko, eta espero dugu hilabete horietan denok hainbeste nahi dugun normaltasuna gurera itzultzea»”, esan du alkateak.
Gabonetan ohikoak izan diren jardueren espiritua berreskuratu nahi dutela gaineratu du Santanok. Hala, izotz gainean patinatzeko pista, atrakzioak eta kaleko animazioa nagusi izango dira urte amaieran. Aurten, ordea, formatu berrituan eskainiko dituzte, eta horretarako aurrekontua bikoiztuko dute. Izotz pista, esaterako, bueltan izango da, formatu handiagoan gainera (1.000 metro karratu ingurukoa). Eta Zabaltza plazan egon beharrean, Ficobara eramango dute.
Gabonetako merkatua ere indartuko dute, postu gehiago jarrita (hogei guztira). Zabaltza plazan jarriko dute aurten, eta urtero bezala, argiztapen berezia eta berritua izango du.
Izotz pistaz eta azokaz gainera, askotariko proposamenak egingo dituzte, besteak beste, txirrista erraldoi bat Pio XII plazan eta herrixka txiki bat Sarjiako parkean. Asmoa da Gabonetako giroa hiri guztira zabal,tzea, eta ibilbide bat sortzea familia guztientzako proposamenak bilduz.
Bestalde, alkateak adierazi du kaleko animazioa egongo dela, baina oraindik zehazteke dutela programa osoa. Datozen asteetan jakinaraziko dute.
Bidasoari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako. Herrigintza egin nahi dudalako. Bidasoko euskarazko komunitatearen parte izan nahi dudalako. Bidasoak eta bidasoarrok behar dugulako. Zure ekarpena behar dugu, babestu tokiko euskarazko komunikabidea.
