Natalia Cambronero irundarrak irabazi du aurtengo Adour-Bidasoa lehiaketa
'Blood' obrarekin gailendu da irundarra. Aurtengo edizioan aurkeztutako lanekin erakusketa bat zabalduko dute, hilaren 17tik aurrera.
Natalia Cambronero izan da 2021eko Adour-Bidasoa Pintura Sariketaren irabazlea, hala jakinarazi berri du Kultura sailak. XXXX. edizio honetan orotara 51 lan aurkeztu dira, eta guzti horiek gertutik ikusteko aukera eskaini nahi dute aurten ere. Hala, obra horien selekzio bat ikusgai egongo da, hilaren 17tik urriaren 10era bitarte, Amaia Kultur Zentroan.
2.5000 euro eta plaka bat jasoko du Cambronerok, aurkeztutako Blood obrari esker. Irunen jaioa da Cambronero, eta Senperen bizi da egun. Bere obra udalaren pintura ondarearen katalogoan sartuko dute.
Bestalde, Aitor Etxeberria Egiguren mendaroarraren lanak jaso du epaimahaiaren sari berezia. 500 euro jasoko ditu Grabitazioa egur gaineko pintura akrilikoari esker.
Gazteen sekzioan Azti Corres Alaminos donostiarra gailendu da, Capricho mihise gaineko pintura akrilikoarekin. Honek ere 500 euro jasoko ditu, plakaz gainera.
Irabazleen artean sailkatu ez arren, Pepe Ezeiza eta Jose Carlos San Martin irundarrek diploma bana eskuratzeko aukera izan dute. Ezeizak Astronauta izeneko lana aurkeztu du, eta San Martinek aldiz, Singular reunion.
Juncal Eizaguirre ordezkariak, irabazleak zoriondu ditu. «Lehiaketa honek argi uzten du artearen sustapenaren eta dibulgazioaren aldeko gure konpromisoa; zehazki, pinturari dagokionez. Ekimen honen 30 edizio egin dira orain arte eta, urteen joanarekin, ospea eta aintzatespena irabazi ditu. Horrela, gaur egun hitzordu garrantzitsua da gure hiriko artezaleentzat, bai eta Irundik kanpo bizi arren lehiaketan parte hartzen dutenentzat edota erakusketa ikustera etortzen direnentzat ere. Edizio honetan, gainera, albiste pozgarria da saridunen artean tokiko artistak daudela ikusteak».
Osasun larrialdia dela eta, aurtengo sari banaketan soilik irabazleek ahalko dute parte hartu. Erakusketak aldiz, honako ordutegia izango du: asteartetik larunbatera 18:00etetik 21:00etara eta igande eta jai egunetan 11:30etik 13:30era.
