San Nikolas zubia konpontzeko aurrekontuaren %1 ere erabili ez izana salatu du Abotsanitzek
Abotsanitzek udal gobernuari leporatu dio, San Nikolas zubia konpontzeko 370.000 euroko aurrekontutik, 3.073,40 euro erabili izana. Hiru urtez segidan aurkeztu behar izan dutela diru partida hau ere salatu dute.
Gaur Abotsanitzek ateratako San Nikolas zubiaren irudia.
San Nikolas zubian aste honetan egin dituzten hobekuntza lanen harira Abotsanitzek esan du, “lau taula aldatu eta sekulako lorpen bezala saldu” duela EAJren udal gobernuak. Udal taldearen ustez, zubiarekin gertatu dena “EAJren gaitasun eta planifikazio ezaren azken adibidea baino ez da”.
2017. urtean teknikariek zubian “egitura ahultasun larriak” antzeman zituztela, eta orduan, EAJk “pasabidea aldatu beharko” zela adierazi izana gogoratu dute Abotsanitzeko kideek.
Horretarako, 2019ko lehen kreditu aldaketan 370.000 euroko partida onartu zuten udalean, pasabidea ordezkatzeko. Partida hori ez zen erabili udal taldearen arabera eta 2020an berriro aurkeztu zuen partida EAJk. Baina berriz “urtea pasa eta ezer ez zuen egin udal gobernuak” salatu dute.
Aurten, Abotsanitzek azaldu duenez, Gonzalo Carrion Obretako zinegotziak 2021eko aurrekontuen aurkezpenean esan zuen, zubiarentzako partida hori erabili egingo zutela, proiektua idatzita zegoela eta esleipena zein obrak egin nahi zituztela.
Astelehenean hasitako lanak amaitu dituzte eta Abotsanitzek udal gobernuari leporatu dio aurrekontu horretatik 3.073,40 euro erabili dituztela: “aurrekontuaren %1era ez da iristen”. Galdetu dute proiektua idatzita baldin badago ea “hain zaila” den “konkurtsora ateratzea”.
