Haurtxoko berri bat izango dute Irungo haurrek datorren ikasturtean
Lesaka kaleko gune berriarekin lau izango dira hiriko txokoak. Izen emateak irailaren 3tik 9ra egingo dira eta tokiak zozketa bidez esleituko dituzte 20ean.
Haurtxoko berri bat sortuko dute irunen datorren ikasturterako. 
Haurtxokoen zerbitzua indartu du Irungo Udalak 2021-22 ikasturterako, Lesaka kalean El rancho izeneko lokalean beste instalazio bat jarrita. 4-11 urte arteko haurrak hartuko ditu gune berriak, eta horrekin, lau izango dira hiriko haurrentzako txokoak: Lapitzekoa, Katekoa, Palmera Monterokoa eta El Rancho.
Gazteriako ordezkari Santi Jimenezek adierazi du izena emateko eskaria asetzeko handiegia izan ohi denez, bizilagun guztien aukera berdintasuna bermatzeko zozketa publikoaren bidez esleituko direla plazak aurten (240 guztira). Parte hartu ahal izateko, aldez aurretik izena eman beharko da webgunean, HAZ bulegoen bitartez, edota 010 telefonoaren bidez irailaren 3tik 9ra. Zozketa irailaren 20ean egingo dute.
Udalaren webgunean dauden oinarrietan jasotzen den bezala, 2010 eta 2017 bitartean jaio (4 eta 11 urte bitartean) eta Irunen erroldatuta dauden haurrek eman ahal izango dute izena datorren ikasturterako. Haurtxokoak 2021eko urriaren 4tik 2021eko ekainaren 24ra egongo dira zabalik.
Txandak.
- Astelehen eta asteazkenetan, 4-8 urte bitartekoentzat.
- Astearte eta ostegunetan, 4-8 urte bitartekoentzat.
- Ostiraletan, 9-11 urte bitartekoentzat.
Ordutegiak.
- Kateko harutxokoa (Araba 46). Astelehenetik ostiralera, 16:30etik 18:30era.
- Lapitzeko haurtxokoa (Deskarga 17). Astelehenetik ostegunera 17:00etatik 19:00etara, eta ostiraletan 17:00etatik 19:30era.
- Palmera Monteroko haurtxokoa (J.A. Loidi Bizkarrondo 12). Astelehenetik ostiralera 17:00etatik 19:00etara.
- El Rancho kaurtxokoa (Lesaka 2). Astelehenetik ostegunera, 17:00etatik 19:00etara, eta ostiraletan 17:00-19:30era.
Kuota.
40,60 eurokoa izango da kuota urritik ekainera bitarteko ikastaro bakoitzeko, eta 22,35 eurokoa bigarren anai-arrebatik aurrera. %90eko hobaria izango dute Diru-sarrerak Bermatzeko Errenta (DBE) jasotzen duten kideek edo Gizarte Ongizateko txostenak justifikatutako egoera berdintsuan daudenek.
