Banderarik lortu gabe igaro dira asteburuko jardunaldiak
Galizian lehiatu da gizonen lehen ontzia asteburuan, eta bosgarren eta bigarren sailkatu dira bertan; Hondarribia B-k laugarren bukatu zuen Pasaiako uretan egindako estropada.
Garaipenik gabe igaro da azken asteburua Hondarribia Arraun Elkarteko gizonen bi eskifaientzat. Lehen taldekoak Galizian neurtu zituzten indarrak, eta bigarrenekoak, aldiz, Pasaian egin zuten arraun. Emakumeek atseden hartu dute azken asteburuan.
Barbanza Arousa Bandera irabazteko borrokatu zuten Mikel Orbañanosen mutilek larunbatean, Rianxon (Coruña), eta XXXI. Concello de Boiro Banderagatik neurtu zituzten indarrak bestalde, atzo, Boiron (Coruña). Hala, larunbatean bosgarren sailkatu zen Ama Guadalupekoa eta atzo, aldiz, bigarren. Sailkapen orokorrean bigarren da Hondarribia, lehen postuan dagoen Santurtzitik bederatzi puntura.
Hondarribia B-k bere aldetik Trintxerpeko Bandera irabazteko norgehiagokan aritu zen arren, laugarren sailkatu zen azkenean. Sailkapen orokorraren hirugarren postuan daude berdeak.
