Mugikortasun Ordenantza onartu du udal batzarrak
Garrantzia berezia hartu zuen atzo batzarrean Mugikortasun Ordenantza EAJ eta PSE-EEk aldeko bozkekin eta Abotsanitz eta EH Bilduren abstentzioarekin onartzeak.
Hilaren 29ko Udal Batzarreko une bat EAJk 2020ko abenduan aurkeztu zuen mugikortasunari lotutako lehen zirriborroa eta onartu berri den Mugikortasun Ordenantza berri honek mugikortasun iraunkorra hobetu, bide segurtasuna areagotu eta ingurumenarekiko errespetua eta pertsona guztien joan etorriak bermatuko dituela sinesten du. Abotsanitzek “soilik publizitatea” dela argudiatuta erabaki zuen abstenitzea eta EH Bilduk puntu bat gehitu zion horri: “eskertzen dugu zinegotzi eta teknikarien lana, baina, adibidez, deskarbonizazioaren inguruan ez da aipamenik egiten”.
Batzarrean beste hainbat puntu onartu ziren baita ere: 2020ko Kontu Orokorra EAJren aldeko bozkekin, Abotsanitzen aurkakoekin PSE-EE eta EH Bilduren abstentzioarekin, udal eraikinen garbiketa pleguaren proposamena Abotsanitzen ezezkoa eta EH Bilduren abstentzioarekin, Amuteko Kaputxinoen Eliza aurrean dagoen plaza Anttoni Etxeberria Mendizabal plaza izendatzea, EH Bilduren abstentzioarekin eta Taupadaz (GKE) elkarteari 1.500 euroko laguntza ematea covid-19ak San Ignacio de Moxosen (Bolivia) eragindako ondorioei aurre egiteko. Aipaturiko azkena alderdi guztien babesarekin.
