Berari hirugarren gradua ukatu diote eta Aitor Olaizola Zaballako espetxera eramango dute
Hirugarren gradua ukatzeaz gain, ez diote inolako baimenik eman ere ez Berari. Bestalde, Aitor Olaizola Zaballako espetxera mugituko dute.
Olaizola Zaballara eramango dute, Berari, aldiz, baimenak eta hirugarren gradua ukatu dizkiote. Francisco Jose Ramada Estevez ‘Bera’ preso irundarrari hirugarren gradua eta baimenak ukatu dizkiote. Sare Bidasoak azaldu duenez, Iruñeko espetxean zegoenean “lau bat aldiz” ukatu zizkioten baimen eskaerak eta Martutenen dagoenetik, lehen aldia da ezezkoa jaso duena.
Martuteneko espetxe-tratamenduko batzordeak “aho batez” erabaki zuen Bera hirugarren gradura pasako zela, Sarek jakitera eman duenez. Baina proposamena jada bidalita zegoela, Auzitegi Gorenaren espetxe zaintzako epaitegiak ukatu egin dio hirugarren gradua, baita baimenak ere. “Espetxe zaintzetan dena blokeatuta daukate sistematikoki”, salatu du Sarek.
Aldiz, Aitor Olaizola Irungo presoa Logroñoko espetxean egon da azken hilabeteetan, zigorraren zati handiena Caceresen egin ondoren. Atzo Sarek jakin zuenez, Zaballako espetxera gerturatuko diote datozen egunetan. Bestalde, Sarek oroitarazi du gaur Olaizolaren urtebetetze eguna dela eta idaztera animatu ditu herritarrak.
