Gizonak garaile eta emakumeak bosgarren, Euskadiko Traineru Txapelketan
Hondarribia Arraun Elkarteko gizonen eskifaiak estropada irabazi zuen atzo Lekeition; Ioseba Amunarriz Euskadiko Traieneru Txapelketa gehien irabazi duen patroia bihurtu da.
![Hondarribiak irabazi du gizonen txandan [Irudia: TKE].](https://bidasoa.hitza.eus/site/files/2021/07/arraun_web-500x313.jpg)
Hondarribiak irabazi du gizonen txandan [Irudia: TKE].
Hondarribia Arraun Elkarteko gizonen eta emakumeen eskifaiek hitzordua izan zuten atzo Lekeition (Bizkaia). Euskadiko Traineru Txapelketa irabazteko lehiatu ziren atzo hondarribiarrak, eta gizonen Ama Guadalupekoa-k zazpigarren aldiz eskuratu zuen garaipena. Emakumeen traineruak, bere aldetik, bosgarren sailkatzea lortu zuen.
2021eko denboraldian fin dabilela erakutsi zuen atzo berriz ere gizonen taldeak. Donostiarra traineruaren aurkako lehia bizia izan zen eta hirugarren luzean lortu zuten Mikel Orbañanos entrenatzailearen mutilek norgehiagokan aurreratzea. Azkenean, zazpi segundoko errenta lortuta irabazi zuten hondarribiarrek, 19.46,83ko denborarekin.
Dagoeneko Gipuzkoako eta Euskadiko txapelketak irabazi ditu Ama Guadalupekoak, baita Eusko Label Ligako bandera bat ere. Gainera, atzo lortutako banderari esker Euskadiko Traineru Txapelketa gehien irabazi duen patroia bihurtu da Ioseba Amunarriz, zazpi guztira.
Emakumeen txandan Donostiako Arraun Lagunak taldea igo zen podiumaren lehen postura. Irabazlearengandik ia 21 segundora sailkatu ziren berdeak, 10.58,79 denbora eginda. Momentuz, ez dute banderarik eskuratu, nahiz eta Eusko Tren Ligako hirugarren postura salto egitea lortu duten Ama Guadalupekoa-ko emakumeek.
