Erabiltzaile kopuruak nabarmen behera egin zuen iaz liburutegian
Udal liburutegiko 2020ko memoria aurkeztu dute gaur goizean; 2019ko datuekin alderatuta, aurrez aurreko erabiltzaileen kopuruak eta maileguek %36 eta %34 behera egin zuten iaz, hurrenez hurren.
Zuloaga Etxeko 2020ko memoria aurkeztu dute gaur goizean. 
Zuloaga Etxea Udal Liburutegiko 2020. urteko memoriaren berri eman dute goizean Kote Guevara liburuzainak eta Juan Luis Silanes Kultura zinegotziak. COVID-19ak eragindako pandemiak liburutegiaren ohiko funtzionamendua eten zuela nabarmendu dute, eta martxoaren 16tik ekainaren 1era arte itxita egon zela gogoratu. Era berean, liburutegiko langileek egindako ahaleginari balioa eman dio hautetsiak, eta «eskerrak» helarazi dizkie.
Zabaldutako informazioaren arabera, 2019ko datuekin alderatuta, aurrez aurreko erabiltzaileen kopuruak eta maileguek %36 eta %34 behera egin zuten, hurrenez hurren. Zehazki, 68.965 erabiltzailetik 2019an, 43.009 erabiltzailera 2020an. Aitzitik, Hondarribiko liburutegiko bazkideek Eusko Jaurlaritzaren E-Liburutegia zerbitzu digitalaren bidez egindako deskargak %90 hazi zirela jakinarazi dute; hain zuzen, 2019ko 764tik, iazko 1.377ra.
Guevarak deitoratu duenez, erabiltzaileen beherakada bereziki adineko jendearen artean sumatu dute. Konfinamenduak iraun bitartean adineko pertsonei bideratutako etxez etxeko zerbitzua martxan jarri zutela gogoratu du. Epe baterako iniziatiba izan zen, eta gerora, pixkanaka, erabiltzaile horiek berreskuratzen joango zirela uste zuten, nahiz eta ez den hala izan. Hala ere, adinekoek konfiantza berreskuratu ez duten arren, 2020ko azken hiruhilekoko zenbakiei «itxaropentsu» iritzi die, «pandemiaren aurreko hilabeteetako mugimendua berreskuratu baitugu». Hain zuzen, larrialdi egoera deklaratu aurreko erabiltzaile kopurura bueltatu zen liburutegira 2020 bukaeran.
Jarduerak eta tailerrak
Etxealdia hastearekin batera hainbat jarduera eta tailer bertan behera utzi behar izan zituzten, eta beste batzuk online modalitatera egokitu. Udazkenean berreskuratu zituzten aurrez aurreko tailerrak, horretarako beharrezkoak ziren egokitzapenak eginez. Hala, irakurketa eta idazketa tailerrak bueltatu ziren liburutegira, baita ipuin kontaketak ere. Horrez gain, Martxoak 8aren harira Emekirekin txokoa prestatu zuten, eta Liburuaren Nazioarteko Eguna eta Liburutegiaren Astea ere antolatu zituzten. Funtzio anitzeko gelen erabilera pixkanaka hazten joan zela ere baieztatu du Guevarak.
